Pontevedra. Manifestación Antitouradas 2013. Sábado 10 de agostos as 8 da tarde na Praza da Peregrina

copio

Na loita contra as touradas cómpre ir dando pasos e xuntando esforzos para que o rexeitamento claramente maioritario da sociedade galega cara este macabro negocio dé lugar á súa proibición e abolición definitivas. Neste sentido, as persoas que participamos en Touradas Fóra de Pontevedra alegrámonos dos pasos dados durante este último ano para reforzar e visibilizar o movemento antitouradas galego, promovidos pola organización irmá Galicia mellor sen touradas. Pasos concretados, por exemplo, na creación da Frente Antitouradas no Parlamento autonómico e na iniciativa abolicionista que só un PP sen argumentos, tan só aferrado à súa visión ideolóxica, impediu que fose aprobada. É necesaria a implicación e a mobilización de todas e todos para seguir a fortalecer o movemento contra as touradas até facer inevitábel a abolición en Pontevedra e en toda Galiza. Ningunha suposta tradición, nin os crueis “gostos” dunhas cantas persoas xustifican a continuidade dun espectáculo embrutecedor, baseado na tortura, a dor e a morte dun animal e que só se mantén grazas a vergoñentas axudas públicas. Por todo isto demandamos: 1. Ao Goberno do Estado, que faga as mudanzas lexislativas necesarias para a abolición das touradas e a paralisación da súa promoción e subvención con diñeiro público. 2. Que o Parlamento da Galiza modifique a Lei 1/1993, de Protección de animais domésticos ou salvaxes en cativeiro, que exclue no seu artigo 5º as touradas, para que prohíba estas actividades. 3. Á Deputación de Pontevedra que as deixe de subvencionar directamente ou de forma encoberta. 4. Ao Concello, o cesamento do uso de espazos públicos para a promoción das touradas, así como a declaración de Pontevedra como “Cidade antitouradas e amiga dos animais”. 5. A reconversión da praza de touros nun coliseo para espectáculos culturais e concertos.